今日朝早 Mandy 就打電話黎,話唔知點算,想同我傾下,結果我就同佢傾左成個鐘,我就仲同佢講要飛 Turkey 喇。
原本就好好地嘅,話佢鐘意嘅係 Thomas,唔係鐘意 Turkey,依家 Thomas 同佢就係時間嘅問題,因為唔係相識好耐。好驚好似佢同 Turkey 咁樣。
咁我同佢講,唔駛咁擔心,有啲野一定係要拍拖耐左相識耐左先會知。另外佢亦都應承我聽日會睇魔戒 3。

Thomas 原本知道我今日會同 Mandy 一齊嘅,佢又話跟埋黎,咁 ok la,點知去到果下先知道原本 Turkey 都跟埋佢嘅。
咁最後原本約 7:00,佢地 8:30 先上黎荃灣金星搵我地。Mandy 行埋去同佢講左聲「算喇」,Thomas 啊左一聲之後,Mandy 就咁行開左喇。
之後同 Thomas 去哈迪斯食野。不過可能呢啲野真係「天意」喇<–(跟風學佢地講野)。
雖然我相信 Thomas 同 Mandy 之間未完嘅,不過都估唔到咁快。係呢個時候,Turkey 嘅阿媽病左,Turkey 即時返屋企睇佢阿媽,但係佢話驚自己嘅老豆心情唔好而鬧 Mandy,所以叫 Mandy 唔好跟住去,而 Mandy 亦都有野要買,所以就留係荃灣。
之後 Mandy 就搵我。原本 Mandy 都唔係好想入黎哈迪斯嘅,不過最後我都係叫佢入喇,無事嘅(結果當然係無事喇)。但係 Thomas 就對 Mandy 幾差下喇(不過呢樣係佢專登嘅,實質係好關心 Mandy 嘅,係 Mandy 揀禮物果下仲同我講過,就算有錢都俾 Mandy 先喇。「之於之前講開啲咩所以咁講就唔係好記得喇」)
之後就送 Mandy 返屋企,係葵芳度,原本 Thomas 就想同 Mandy 傾下,不過見 Mandy 頭也不回咁想返屋企,佢話算喇。不過當然喇,我就唔會算嘅,我出聲問 Mandy 得唔得閒傾幾句。Mandy 望望個鐘話可以傾 10min 左右。<–喇,可能呢啲又係「天意」喇,唔係我出聲,跟住落黎嘅事就唔會出現。
係度傾傾下, Mandy 媽打電話黎擔心個女,咁佢問駛唔駛落黎接佢,Thomas 就話叫埋佢阿媽落黎喇。
結果 Mandy 媽真係落左黎,仲係幾兇神惡殺果隻。Mandy 媽原本就認定左 Thomas 係纏住 Mandy 嘅人,所以落黎好明顯唔係咁客氣嘅。
不過 Thomas 就醒目喇,事先表明今次講嘅野嘅目的係想伯母了解 Turkey 呢個人,講哂所有利益關係。之後再將佢知 Turkey 嘅野講俾伯母知(Mandy 一直都無講俾伯母知 Turkey 係一個點嘅人)。
最後雖然唔知伯母點睇法,不過好明顯有個一機會從新評估 Thomas 呢個人喇。
而最好最好嘅,係解開左 Mandy 心中一直係度嘅一個結。
題外話:Mandy 其實係呢個時間先真真正正咁應承我聽日睇戲。
傾完之後其實 Thomas 都好緊張家,因為佢唔知 Mandy 會點揀(唔通真係兩個都唔揀?),一路搭車一路睇住個電話,係咁係度等,不過隨住時間嘅過去,佢嘅心就越黎越沉重,仲開始打定輸數添。
當然喇,佢收到個Message 理論上原本就好開心嘅,不過就繼續表現個灰樣俾我睇,交個電話俾我…..等我以為…唔係呀….。我睇完之後知係好消息,媽叉佢整個咁嘅樣俾我睇嘅時候,佢先係度笑。
之後我就搭車返屋企,係我臨上車之前就收到 Mandy 電話,佢地講咩我就唔知羅…..

Previous article新一年 新開始
Next article魔戒 3

網名:Enterpr1se,人稱「企企」
自幼喜歡 StarTrek 星空奇遇記所以用片集內的星艦 — 企業號 來做網名。

年輕時曾擔任《電腦時代》助理編輯,主力評測各種產品,和撰寫技術文章。
出過數本書仔,聽聞賣得不錯;現在轉戰博客,繼續有果句講果句。
喜歡新事物,愛攝影、玩Gadget,夢想能每年去一次旅行。

聯絡電郵:[email protected]