iPhone 熱剛剛聽完最後一集,即係 147 集 iPhone 熱。

記得初初接觸 iPhone 熱是因為買了 iPhone 3G 無耐,想試下 podcast,就想搵返 Talkonly (之前一路都有聽開,不過有一排因為懶無聽,果下用 WM 機下下要走去 d/l 落黎再放落去係好唔方便) 黎聽,不過係搵到既同時,又搵到 mobileradio.hk,之後就揀到 《iPhone 熱》同埋 《ITM》 兩個節目 (當然有聽過《潮吹》、《性在誘心人》同埋《吹爆那話兒》喇 XDDDDDD)

一聽就聽超過兩年喇,雖然中間有幾集因為 Podcast 未整返好所以無聽 (都係一個”懶”字),其實都幾過一段唔短既時間喇 (由 3G –> 3Gs –> iPhone 4)。
記得第一次同 iPhone 熱主持"交手"係佢地介紹一個整 ringtone 嘅方法,我覺得仲複雜過用 itune 整,所以同佢地講不如教返 itune 方法喇,之後 Stella 講話其實一早介紹過 itune 方法,新方法只係想介紹多個方法姐。
雖然期間都轉過 D 主持,不過台柱當然係 Stella 喇,幾乎集集都聽到佢把聲,最親切。
但要數印象最深一定係 Tommy,因為 iPhone 熱係第 100 集果下搞過個 Party, 果陣見過哂所有主持真人,而佢真係好似男版阿蘇 (蘇施黃)呀。
記得我一講出黎 Stella 都好認同呢。

如論 iPhone 對我最大形響,絕對係 Twitter,因為我係聽 iPhone 熱而認識 Twitter 呢樣野,而 iPhone 熱各主持亦都係我第一批 Tweet 友,果陣咩都唔知,大部份都係自己摸索 + 聽 iPhone 熱而聽返黎。
而令我最敗家既,一定係 Aiki,因為佢貴為 Twitter 天后,佢試過好多 Twitter Client 話覺得好,我又走去 Download,所以依家 iPhone 入面有成堆 Twitter Client App 係度。(我無玩老翻,真敗家)
不過最遺憾係 iPhone 熱以前既搞既茶聚一次都無 Join 過,而佢地後來亦都無搞喇。

iPhone 熱的確係俾香港本土 Developer 多一個宣傳渠道,因為 App Store 真係太多 App,好快就唔知去左邊,消失係茫茫 App 海之中。而 iPhone 熱令唔少 Developer 可以宣傳一下,絕對有助本土App 發展。

而 iPhone 熱最大好處係 App 介紹喇,不過由於依家 D App 特價時段越黎越短,好多時 24-48 小時而已,所以由發現,到錄音,再到播出,已經變返收費 App 喇,呢方面留意 Twitter 反而會係更好既渠道知道。
但有時唔少好玩既 App,係各主持既心水選擇,係 iPhone 熱播出後我都會去留意下載嘅。

最後祝各位主持前途似錦,亦有機會再錄節目喇。