軒哥事件

最近香港最爆嘅新聞,應該都係有小學生係學校派幾萬蚊,只係想人地叫佢一聲「軒哥」,而目的係想向心儀嘅女仔揚威。
當然係呢件事上面,最有問題果個係呢個小學生嘅家長,細細個就俾四萬零用錢俾一個小學生。
其實咁細個根本唔知「錢」嘅概念,做成今日「港孩」嘅問題。

睇返高登,其實有個評論都幾啱:

你睇清楚今時今日嘅教育體制, 教育已經係政府眼中係一盆生意
生意唔係問題, 但政府只係著眼即時回報
教育理應係投資
當連教育制度都係同錢掛勾
係一個咁嘅社會上面, 個細路嘅」道德」並無違反現金香港嘅制度
咁佢有咩錯?
以前政府係教育係講對香港嘅「投資」,維持香港嘅競爭力。
依家就係講求短時間嘅回報,例如推行直資制。
間間學校有大量儲備,而且仲繼續加學費。
要入「名校」就需要非富則貴。
根本成個教育嘅理念就由「教育英才」變做純「搵快錢」。
係咁嘅環境下,個個學生都係鬥屋企有米。


無錢嘅話就俾老師羞辱,當然我唔知呢單係唔係真,因為個學生本身係好有問題,但我識得有朋友做老師,而佢嘅同事就真係對窮嘅學生特別差,對有錢嘅學生係特別好,呢個就真係真家喇。

最後又係 Quote 高登「膠文」時間,純搞笑:

【高登專訊】明報報導,大埔某中二學生從家人手裏拿得四萬「零食錢」,不乖乖地收起來「底調處理」,卻跑到學校走廊派發,每位拿錢的同學都要叫他一聲「軒哥」。 他一派錢,登時全校哄動,校方随即驅散學生,把「軒哥」 帶走, 並且輔導一番。 高登特約膠員立刻聯絡軒哥進行一次專訪。

膠﹕而家我叫聲軒哥可唔可以要desire唔要iphone?
軒哥﹕無所謂,老師教我們施比受更為有福。
膠﹕你點解要係學校派錢?
軒哥﹕我覺得我要咁多錢都無用,不如大家分享一下,大家開心,何樂而不為。

膠﹕咁你覺得點解校方會阻止?
軒哥﹕好簡單,因為老師無得拎!
(軒哥點起一枝中華香煙,呼出一口煙)
軒哥﹕佢地無理由叫我軒哥,所以連其他人都唔比拎,香港嘅老師目光短淺,只係識係班房扮晒野樹立自己權威,出到黎什麼也不是。
膠﹕如果家人比你四十萬,你係未都會派晒?
軒哥﹕Of course,如果我好似誠哥咁有錢,好似有千六億,我會派一千五百九十億,因為我洗唔晒。

膠﹕對於校方同社會咁嘅反應,你有咩感想?
軒哥﹕我只係用四萬蚊就看透香港人嘅虛偽,平時講乜施比受更為有福,要幫助有需要嘅人,唔好貪心,要知足,全部都係廢話。你問全校人,邊個唔讚成我咁做,我諗除左話事個幾個外無人會反對。不過我知道香港成個社會都係咁,全港市民反對但只有十幾個人讚成都會進行。
膠﹕你點睇解政府個關愛基金?
軒哥﹕晒尻氣,我用四萬蚊幫到嘅窮人仲多,起碼人地拎現金,唔講廢話。

膠﹕對於而家讀緊書嘅高登網民,你有乜建議比佢地?
軒哥﹕好簡單,退學。學校只係訓練工廠,唔係教育,佢地只係將後生仔打造成佢地想要嘅人。學店揾幾個鬼佬黎吹下水就收你幾皮野一年,學埋d無用嘅野,讀書係為左明理,唔係買cert。君不見時下大學生有幾明理,可能本身香港呢個社會就係反智。
膠﹕謝謝你的忠告,我會講比大家聽。好多謝軒哥抽空接受採訪。
軒哥﹕唔駛客氣,呢度有個LV袋我覺得個Pattern好單調,你要唔要?
膠﹕好呀!軒哥!多謝軒哥!