自家烏冬

尋日落尖沙咀,搵野食,行行下見到一個好大塊嘅招牌,板獎火鍋,所以走埋去睇睇。

見到佢有兩個套餐,一個係 6人 ($9xx),一個係9人($12xx),又唔見有其他揀,所以都無興趣睇落去,見到隔離間烏冬專門店,所以入去一試。

入到去,又係早了點,所以好多空位,裝修 OK,樓底高,檯大張,坐得一啲都唔迫,點了「吉列豬扒咖哩烏冬」($45)和「牛肋條南瓜汁撈烏冬」($55)。
留意下四周,原來呢間又係板前/味千系列,又係鄭威濤旗下食市。
再睇多陣餐牌,見到牛肋條南瓜汁撈烏冬做緊特價,只要有 CitiBank 信用卡就特價 $40,我一見到就知我奶左野喇,唔方好食。
結果,吉列豬好快到,炸得都 ok,而烏冬亦都不錯,”煙煙銀銀”咁,幾好咬口。但湯就真係好一般,令到成碟失色不少。
結果等到食完哂,我碟牛肋條南瓜汁撈烏冬仲未到,原本就 cancel 咗佢,但果陣我講緊電話,GF 就幫我問問點解仲未到,佢地係完全漏單。
碟烏冬黎到,一試,自知奶野,話係南瓜汁,可能我食得少,所以唔清楚係唔係,但味道就真係一般。而 D 配菜同主菜牛肋條,都係麻麻。牛肋條未至於係「銀」,但係唔係好味,或者應該咁講,係唔值咁嘅價。

睇返 OpenRice,評價都係唔好果種,有人甚至連烏冬都覺得唔 OK (咁即係一無事處)。
而漏單情況亦唔只發生係我一個人身上,係 Openrice 都有人有咁既情況,相信情況幾普遍。
我覺得呢間未至於話難食,但絕對唔係出色,以咁嘅價錢,係尖沙咀有更多更佳嘅選擇。

地址 : 尖沙咀赫德道6號好德商業大廈地舖
電話 : 2312 0030

吉列豬扒咖哩烏冬
吉列豬扒咖哩烏冬
牛肋條南瓜汁撈烏冬
牛肋條南瓜汁撈烏冬