這篇文章(教學)是由一位 Seediq 賽德克 的巴打根據自身經驗而寫出來。
由於放在 facebook 不易被搜尋到,所以問准作者後轉載至這個 blog.
以前來說常人未必用到,但現在只在現場紀錄一樣有機會中招被拉,所以知多一點對自己永遠無壞。

另外這裏亦有一篇 HKITBLOG 所寫的「如何隱藏網上行蹤避開「有心人」監控?」,方便人們匿名上網,避開政府亂用的「不誠實使用電腦罪」


光復行動注意事項(唔睇唔好出嚟行)

前言︰

小弟係一五年光復元朗入面被拉嘅一個。下面講嘅野,係結合自己同被捕者經歷嘅小小總結。旺角一役之後,每個出黎嘅人,就算係路過都好,都有可能被捕,希望大家認識下被捕嘅流程同權利。

任何示威已經被港共定性為暴動,差佬會用盡一切方法打壓,每個參與嘅人都要有心理準備會被拉。因為差佬會用任何方式任何理由去拘捕,無一倖免,所以決定出門前,做好準備。有所得必有所失,出得門就要有流血嘅覺悟。

經過光復之後,所有抗爭被捕人士,都極有可能羈留你兩晚,然後直接上庭。唔係要你坐監,因為好可能告唔入,而係要殺雞儆猴,增加行動者嘅成本,帶黎阻嚇。好似我咁,第二次上庭就話唔夠證據,撤銷控罪。就算係「暴動罪」都好,無案例無參考,點判都未知。但你去得,就要預左被拉,拉得,就預左坐四十八個鐘。所以我好想話你知,拉前拉後,你有咩可以做。

以下,係再有騷亂,差佬會大搜捕嘅情況︰

事前

1.       Hard disk加密

詳情睇呢個〈香港城邦政府資訊科技部:社運行動者IT基本功,視窗環境下如何加密硬碟, 確保資訊安全〉http://www.vjmedia.com.hk/articles/2015/03/18/102135/

重要資料,喺windows入面再入zip檔加密。

2.       滙報行蹤,交低個人資料

事先同熟人講低個人資料,中英文全名、身份證號碼同年齡,確保大家都知道對方嘅資料,出事都可以第一時間搵律師協助。話定畀朋友聽你去左邊,如果幾點幾點搵你唔到,就聯絡律師搵你。上網會搵到義務律師,無論本土泛民熱血左膠都有相熟義務律師,要搵就實有。穩陣起見,你自己都背埋啲義務律師電話,需要時可以用。

3.       朋友同行

必須要有朋友同行,被捕後,朋友可以搵律師幫你。而大家都要攞住相機或電話,隨時準備拍攝。萬一被拉,朋友拍攝嘅片段,將會係你他日上庭嘅重要證供。大家都有睇好多案例,襲警極易入罪,如果無片,上到法庭個官唔會信差佬講大話,而只會信你襲警。如果一個人出到去,唔該即刻搵隊友同行,如果一個隊友都搵唔到,請你即刻離開,唔好戇鳩鳩一個人走黎走去。

4.       衣物

深色衣物,口罩係基本,戴左先出門,唔好去到現場先戴。再安全啲,着件有帽嘅褸,配多條頭巾(通常單車鋪有得買)。帶多件褸,離開現場後着,之後將原本出街嗰套衫衫褲褲丟左佢,所以盡量揀啲平時唔着嘅衫出門。之前好多單都因為示威者帶左口罩而佢唔入,唔好諗住自己行得正企得正,唔會做過激行為就鬆懈。

絲打嘅話,雖然你着黑絲短裙出去,高登仔會睇到好撚爽,但你因為咁而凍親,巴打都會好心痛。有絲打話,差佬會叫女人除legging黑絲,驚你自殺,而入到臭格,係會凍撚到仆街,而家咁嘅勢,凍死都唔會有差佬好心可憐你,都係着返條長褲啦。

5.       行裝

危險性攻擊性物品唔好帶喺身,包括萬用刀、火機、鉸剪同cutter、一個唔好彩搜到你有,就係「藏有攻擊性物品」。如果真係被佢搜到有危險物品,佢問你有啲咩用,都唔好搭佢,要拉要塔就由得佢。唔好以為佢警誡你嗰刻先唔講得野,而係任何時候,人類都唔應該同啲畜生接觸。唔好用八達通,銀包袋定一千幾百或者銀行卡,EPS至少可以撳到三千蚊,到時保釋用。

6.       電話

用太空卡,加一部平時無用嘅電話。而本身用開部電話,開着佢放喺屋企,關閉指模解鎖,用返字元密碼,八個位以上,愈長愈好,設定撞十次會洗晒啲資料。裏面有嘅政治群組全部要刪除對話紀錄。另外,無一個通訊軟件安全,就算telegram都好,真係要傾敏感野,唔好用電話傾。

7.       行蹤

來回都盡可能唔搭地鐵,轉多幾程車,點都要搭就隔一兩個站上落。口臭再講多次,唔好犯相同錯誤,唔好用八達通。行路行內街,唔好咁貼舖頭行,周街都好多閉路電視。

8.       送飯

同你朋友講定,邊個被捕,係朋友嘅一定要送飯入黎。其實,差館啲飯又唔係話好難食嘅……不過係好撚難食啫!全部係上欄廚餘,啲飯會用汁整到勁淋勁濕,如果你唔係好好好撚肚餓,你係唔會食得落。雖然唔食兩餐唔死得人,但嗰一刻,一口食得落嘅熱飯,會係好實在嘅支持。喺呢道,好多謝喺倉入面將佢半個飯盒分畀我嘅嗰位朋友,嗰一下,真係滾動到喊。我敢講,嗰啖飯係我食過有史以黎最好味嘅。


現場被捕

1.       掙扎反抗

如果被幾個差佬撳住無得走,咁就唔好掙扎,因為有可能會告埋你拒捕同襲警。問佢警員編號同全名,以及用咩罪名拘捕你。如果拉你嗰條罪,同告你嗰條唔同,呢個有機會成為抗辯嘅理由。

2.       大聲宣佈被捕理由

拉得你,現場一定會哄動,一定會有傳媒影住。呢個時候,唔好怕醜,要大大聲聲話畀鏡頭知差佬以咩理拘捕你。最好嘅話,講埋拘捕你嘅情況,例如上次有個女仔無端端被差佬撳低,成面爆晒血,畀班狗話襲警。咁樣係要畀社會同輿論去咬住差佬,要佢地解釋發生緊咩事。如果聽到話帶你去邊間差館嘅,咁就大聲講埋畀周圍嘅人聽。

3.       電子裝置

可行嘅話,咁好彩無落你孖葉,偷偷地丟鳩晒啲電話相機。


上門被捕

1.       協助調查
隔住度閘問佢警員編號,案件編號(RN Number),問佢做乜事,如果佢係話「協助調查」,咁你可以唔理佢,拒絕協助。

2.       拘捕
如果佢話「拘捕」,問佢有無搜查令,因為無嘅話佢唔可以入屋攞證物。有嘅話,隔住道閘慢慢檢查,睇清楚所有資料正唔正確。

3.       閂門
檢查完後,話要打畀律師同換衫先,閂門,即刻毀滅電話同電腦hard disk。

4.       扮無人
如果有太多野要銷毀,直情唔好應門,佢地無咁大意欲爆門,三十分鐘左右就走人。但差佬好狗,會打你電話確認你喺唔喺屋企,記得電話校無聲。但差佬申請搜查令都係幾個鐘嘅事,唔好以為老定唔開門就得,儘快做好準備。拆開Hard disk,入面有塊銀色嘅磁碟,開個火爐燒到變紅色,之後拎去餵魚。其餘記憶卡,所有重要資料,都用secure erase 軟件覆寫(overwrite)或格式化(format)。

徹底銷毀硬碟資料嘅七大方法,http://www.ithome.com.tw/news/98930

如果又有大鑊野,而你又覺得好大可能被捕,咁你一返到屋企就好毀絲滅跡啦,唔好等差佬上門先做野。

5.       影相

建議被捕前影下自己,證明自己身體並無任何損傷。以防犬之後用暴力,到時都有證據投訴。

6.       出門
真係要出嘅話,洗個面,換件衫,帶多兩件褸。如果本身有食開藥,咁就袋埋,仲有醫生卡或公立醫院醫生紙。出到去同佢講,我要飽肚食藥,無藥同有咩頭暈身興,就要去醫院攞。咁樣可以避免佢地狂砌你。


搜查

1.       唔好傾電話

要搵朋友嘅,喺佢地未入屋前打定,班狗唔係善男信女,會搶電話架。

2.       大頭相lock screen

為防被屈偷電話,用自己大頭相做lock screen。

3.       睇清楚搜查令

地址有錯搜查令就失效,而且搜查令一般係撿取家居物品,唔包括電話,如果佢要收埋部電話,張搜查令會寫到明。就算收,你都無任何必要同佢講密碼。

4.       抄低內容

有權抄低搜查令內容,如果攞走左啲搜查令以外嘅野,係唔可以攞上庭做證物。抄完先開始畀佢地搜。

5.       唔好答問題

你無義務講啲野收喺邊,等佢自己搵。


警車

1.       驗傷/入醫院

上到警車,即刻同個差佬講話你要驗傷,要去醫院。就算你毫髮無損,你都可以要求驗傷。一黎係保護自己,入差館前有個紀錄,證明你完好無缺,萬一入到去被打,都有得指證。二黎係增加差佬行政成本,佢地都預得留你四十八個鐘,我地就玩到盡。一條友去驗傷,佢最少要派兩個差佬陪你三個鐘頭,又要警車接送,事前事後仲要準備好多文件。但唔會你話驗佢即刻帶你去,你要煩鳩住佢。你可以話唔驗傷嘅話唔落口供。

絲打M到可以要M巾,M痛可以入院,你地明嘅。以我經驗,入院好過喺差館,起碼運動下,吸兩啖新鮮空氣。

2.       問話

上到車,差佬會即刻問你野,基本上,除左姓名、住址同電話之外,你咩都可以唔答(包括職業)。不過,又無話一定唔可以講野,但一牽涉到政治議題立場同遊行示威情況,你就要即刻收口。當然,如果你分唔到咩講得咩唔講得,咁安全起見咪咩都唔好講。

3.       毒打

有心理準備,會被狗毒打。忍左佢,落車即刻驗傷。

4.       電話解鎖

屌你老母,如果你咁戇鳩無用太空卡無用新電話,而被差佬攞到部舊機。差佬會叫你解鎖,話要熄左部電話佢。你可以嘗試亂鳩咁撳,亂入密碼洗自己機,或者你答佢︰「屌,仲好講,唔記得左喇,頭先畀你地幾十個人圍埋黎,嚇到乜撚野都唔記得左呀仆街。」


差館

入到差館有好撚多野要簽,可能簽嘅野會多過我以下寫嘅,因為我都唔記得晒,最好乜撚都唔簽,但基於壓力下或者會屈服,但無論咩都好,簽之前一定要每粒字睇清楚,包括中文英文,而牽涉到案情嘅,就千祈千祈一撚定一撚定唔好簽。

  基於你唔合作,乜屄都唔講,一開波會有好多差佬輪住黎屌鳩你,當屌完一輪之後,又會有條粉皮好聲好氣扮知己,問你發生咩事,話你唔出聲佢地幫你唔到。如是者,好彩就一次,唔好彩就三四次,重重覆覆,屌完又氹,氹完又屌咁,不為所動就得架喇。(我搞笑啲,差館人手有限,屌我同氹我嗰個係同一條友33997黃國建,我望住佢真係笑左出黎,好撚驚佢精神分裂。)

  記住啦,出得黎行預左要還,入得差館就要付代價。唔好話屌你,就算打鳩你都要照食。有過來人話扮可憐,流下眼淚,有啲差佬會因為咁而心軟,唔落咁重手。如果你交到戲,試下無妨。如果你堅持唔到簽撚左佢啲濕鳩證供,咁耶穌都幫你唔到。驚嘅,唸下文天祥首正氣歌啦,「天地有正氣,差佬仆街死」。

  不過,雖然話耶穌幫你唔到,但上帝係會畀機會人嘅。如果真係簽左份口供,唔理戇鳩又好自願又好,兩日後上到庭,記住同律師講,你係被威逼之下簽嘅,因為你真誠相信,如果唔簽會畀差佬毒打,差佬亦出言恐嚇話會用盡一切方法令你簽。假設法官相信你係基於保障生命而非自願簽口供,咁份口供有機會無效。但記住,一定要一上庭就提出。另外,精神錯亂,若然證明到你當時精神狀態係唔適合落口供,唔知做緊啲乜,都有機會推翻口供。但要搵醒一句,「威嚇」同「精神錯亂」係理論上嘅抗辯,真正要啟動唔係咁易,為免夜長夢多,唔簽同案情有關嘅文件最實際。

1.       權利

呢樣野又好撚緊要,老實黎講,差館入面嘅任何權利都係要自己爭取返黎,爭取嘅方式就係煩鳩住佢。而「同律師講」,係最大阻嚇力嘅說話。

你可以去醫院睇醫生、攞紙攞筆寫野(包括寫低同倉兄弟嘅聯絡資料同律師電話)、飲水、食三餐、打電話畀律師(不限次數)、打電話畀屋企人(不限次數),但全部野你開到聲,差佬都會話「安排緊,等陣先」,你唔使同佢拗,話你有乜乜乜乜權,點解你唔畀我?你只需要隔五分鐘十分鐘出一出聲煩鳩住佢就得,如果咁啱有大粒野經過,例如當值官,你最好即刻出聲。之後個白衫會望撚住個藍衫,心入面諗「屌你老母,少少野都要煩鳩住我」。

2.       被捕須知

第一張係被捕須知,裏面會講你已經被捕,你同時會有啲咩權利(有啲咩權利我陣間講)。你有好多時間,慢慢睇清楚先。

3.       搜身須知

呢張野會同你講你將會被搜身,入面會寫埋搜身嘅方式,使唔使除衫除褲。而好多年前判左差佬違反人權,而家搜身係唔須要除衫除褲,所以,記住,如果張搜身須知剔左「除衫搜查」嗰欄,一定唔可以簽。而就算你無簽野,搜身嗰陣佢都有可能話要你除,你話張野無寫,唔撚好理佢。(上次就有個中學生,因為咩都唔知,被差佬除底褲搜身,屌佢老母。)差佬堅持嘅話,你就話要等律師在場先。

4.       被捕經過/警員紀錄簿

呢到好撚緊要,你成版唔睇都得,但呢個一定要睇。你鳩坐等搜身嘅時候,拉你嗰隻狗就會笑笑口走埋黎,同你講佢會補錄返拘捕你嘅經過,問你明唔明白。佢就會開始鳩寫,寫完之後會向你鳩嗡返次,叫你寫段「我明白及同意上述口供……」,再叫你簽名。而內容百份之一百二十係無中生有,即係屈鳩你。(好似我嗰份咁,最少有兩個自相矛盾位。)首先,呢份唔撚係正式口供(正式口供都唔撚會簽,你要我簽呢份濕鳩野?),再者,呢份野係用黎屈鳩你,你簽左即係認左佢嘅指控,所以點撚樣都唔簽得。

而你堅持唔簽之後,佢會搵上一級(通常係沙展)做counter sign,簽完之後會再畀你睇。記住,就算你無簽,你都有權問佢攞份副本,而我唔係同你講你有權利,而係叫你一定要攞,幫你上庭指證返差佬作口供。

5.       搜身

褸要除,但唔使除衫,記住!如果期間被侵犯,記低時間同搜查者編號,同律師講。絲打嘅話,搜你身嗰個一定只可以係女警,否刖你可以出聲反抗。而班人渣甚至可能言語上性騷擾,小事就忍左佢,忍唔到就記低編號同律師講。

6.       證物入袋

呢個步驟最撚麻煩,佢會逐件逐件將你個袋啲野拆開黎睇,之後入證物袋。過程中,差佬見到啲特別野,佢會問你點解會喺身,帶過黎做乜。都係啦,唔撚好理佢。佢會叫你除晒身上面有嘅繩,包括褲頭帶同皮帶。如果你跟足我講,你個袋應該會有多件褸,同差佬講攞埋出黎,畀你喺臭格嘅時候着。

物件收左黎做證物,就要等單官司完左,兩至三星期後先可以去狗屋攞返。如果三星期內無人聯絡你,咁就要自己打去問。

7.       入臨時羈留室

搞掂晒之後,入臨時羈留室,有眼鏡嘅會被佢收撚埋,話驚你自殺喎。你試下同佢講,話你無眼鏡會好撚頭暈,如果你好彩,個差佬未必會收你眼鏡。入到去,會係短暫放鬆嘅地方,因為一間羈留室應該有六至七個戰友,呢個時候大家可以吹下水。但唔好吹案情或做賽後檢討,因為差佬可能偷聽,甚至可以作為呈堂證供。有巴打話,外國有差佬會扮犯係度套料,就算戰友都可能出賣你,所謂 jail house snitch,慎言為上。

8.       搵律師

如果你朋友夠老死,應該聯絡左律師,但出面可能無人知你邊間差館。所以你最好一有機會就煩鳩住啲差佬,話要打電話畀屋企人同律師(當然咁你到時打畀邊個佢唔鳩知),再同出面講你喺邊間差館,等律師聯絡你。

而萬一無人幫你安排律師,咁你就要自己搵。所以一開波就叫你背左律師電話佢,入到差館就打畀律師。差佬都會畀份律師名冊你,你可以試下求鳩其點指兵兵點個名。

另一個方法,同倉嘅人都會陸陸逐逐有律師會見佢,你地睇下邊個人無律師,捱義氣幫佢同自己律師講。當日,我個倉有位巴打,背左五個人嘅中英文全名加身份證號碼去同律師講,好感激佢,而當中有一個中學生,本身真係無人知佢被差佬拉左。總之,到時大家守望相助,入到去就係兄弟。

9.       羈留室
羈留室即係臭格,同監獄風雲見到啲監倉差唔多啦,有幾張石屎床,後面有踎廁。都無乜特別,臭又唔係話好臭,係好撚凍啫。你係有權問佢攞毛毯嘅,不過都係嗰招,要煩鳩住佢。同埋啲毛毯好撚臭好撚多菌,無,唔係叫你唔要,畀個心理準備你啫。而你係可以要求沖涼嘅,如果要爆石,亦可以同差佬要求去其他廁所,佢地基於衛生,都唔會想你喺臭格痾。

10.   落口供

可以要求同律師一齊落口供。情況同啱啱入差館嗰陣,叫你簽嗰張口供紙差唔多。但今次應該會係CID同反黑,佢地雖然都係用嗰招,軟硬兼施,黑白雙煞。不過,兇嗰個會兇好撚多,溫柔嗰個又會溫柔好撚多。記住,呢個階段,乜撚野都唔好簽。佢會同你分析案情,話你都好無辜,又話你要肯講出黎,佢地先睇到係咪同事誤會左你;又會話脆脆地認左佢,守行為搞掂,案底都唔使留。唔好同佢爭辯或者討論案情,佢問你乜,你答佢「我無野講」,最後問佢攞返張口供紙。佢好可能會唔畀,你回應話你會同律師講。如果係絲打,可以話被男警騷擾,要求換女警落口供。

視乎返對家派啲咩人,如果好聲好氣嘅,咁你同佢好來好去,話「我無野講」,快快手手搞掂佢。但如果佢一開波都兇鳩你甚至打鳩你,咁玩盡啲,反正都係要捱。你可以選擇用英文日文各國語言落口供,其他語言就一定要搵翻譯(客家話福建華潮洲話都要),英文嘅話有可能搵個識英文嘅同你落,你屌佢英文屎,然後要求搵翻譯。正啊,一搵翻譯又要搞多兩三個鐘頭。或者將你中學背嘅所有詩文背晒出黎,再唔係求撚其吹啲故仔出黎,你講幾多佢都要寫,到最後等佢寫完,同佢講,唔簽!

佢亦都可能要求你自己寫或攝錄口供,可以拒絕。至於錄影口供,拒唔拒絕自己決定。錄影口供好處係當佢同書面口供有出入嘅時候,有啲情況甚至可以反控差佬偽造口供,但相反,就算唔簽名都好,錄影口供可以呈堂,假若講錯嘢神仙難救。

畀多篇律師教點落口供嘅文大家參考,〈2015警察故事 口供點樣落?〉http://www.pentoy.hk/時事/l516/2015/05/18/2015警察故事-口供點樣落?/

呢個過程我覺得好撚難捱,我當時係好撚驚,好驚佢會打鳩我。因為大家都知,入左差館,佢地真係做乜都得。而經過旺角一役,可以話一定打鑊金。我當時諗起好多野,「出得黎行,預左要還」、「怯,你就輸成世」、「申冤在上帝,審判也在上帝」。呢啲,叫信念,叫正義,班狗無嘅。

11.   檢控書

搞掂之後會帶你去打指模同影相,最後會畀份檢控書你,寫明你因為咩事被拉,亦會有簡單案情(差佬版本)。佢會問你有無補充,你答佢「我無野講」,如果你無簽份口供,咁呢份野佢都無乜誘因迫你簽。

12.   上門搜查

有可能差佬要求上門搜證,問清楚有無法庭搜查令,而搜查令嘅地址係咪絕對準確。假設寫錯左任何一個字母,張搜查令都係無效,佢要申請過張。佢好可能無搜查令,會話點都係要上你屋企,如果等搜查令,咁就要留你耐啲,要坐多日先上庭,但事實佢係坤鳩你,法例寫明四十八小時以內,差佬一定要落案起訴,一係就畀佢保釋。如果點都係留咁耐,咁就同佢玩到盡。

上去之前,問清楚佢要搜查啲乜野資料,如果上到屋企,佢拎走啲唔關事嘅野,可以出聲阻止,要求解釋取證原因。記憶力好嘅話,記低張搜查令內容,睇下同佢拎走嘅嘢有無出入。

13.   警署保釋

有可能四十八個鐘內放你,要求你交保釋金,一開始會係一千或五百,到時就拒絕唔交,咁佢會慢慢降,到最後十蚊都唔好交。因為交左即係接受保釋條件,要定期到警署報到,好撚煩。如果佢決定畀你保釋,即係無心即刻過堂,咁最後你一定可以無條件走。佢會話你唔畀錢保釋,會即刻拉你,咁你咪話由佢拉囉,都係嗰句,畀得你保釋就唔會預第日拉你上庭。如果你簽左保釋,咁下次返警署可以踢保。


法庭

1.       當值律師
過堂前會安排當值律師見你,佢會同你交待你嘅控罪同案情。如果你喺差佬受到任何不文對待,咁就向佢投訴,作用係紀錄低,有助日後官司。如果你咁撚戇鳩簽左張口供紙,容我再一次屌撚柒你,記住話你係覺得「生命安全受威脅」而簽,唔係自願。律師都會問你有幾錢可以保釋,唔想畀咁多錢,可以試下講少啲。

2.       過堂
主控官講案情,問你清唔啨楚控罪,你答「清楚」就可以,毋須答辯,唔好喺呢個時候「認罪」。

3.       法庭保釋
一般黎講,法庭都會批准保釋,但會有附帶條件,例如保釋金、禁足令或者警署報到,如果保釋條件太唔合理,係可以反對或通過律師反對。亦有可能唔畀保釋,會即時入羈留所,但亦可以向高等法院上訴,律師會同你傾。

4.       離開
如果想早啲走,叫屋企人或朋友到庭聽審,你一過完堂佢地就落去交保釋金。否則,要等你攞返啲個人物品再畀錢保釋,都要等好耐。門口會有好多記者捕住,唔想見樣嘅話,着好防護裝備先出去,可以問法院職員拎口罩,相信亦會有好多兄弟喺法院門口幫你開路。如果法院就黎收,咪等多陣無記者先行出去。


保釋後

睇返自己控罪係乜,上網搵返當日啲片,搵到合用嘅話,記得問返原拍片者,確定片段係無修剪版先可以上庭。如果你無任何政治組織,咁就要搵佢地幫你手去請律師。本民前個銀行戶口呢兩日過晒轉帳限額,可以見到肯出錢幫行動者嘅人多不勝數,唔好怯,唔好自己一個面對,唔好用法援署啲律師!

附上《警隊通例》入面,有關被拘留人士權利嘅文件,以供參考。http://www.police.gov.hk/info/doc/pgo/sc/Cpgo049.pdf


如果無被捕

1.       迂迴離開

唔好直接返屋企,行兩個地鐵站,轉幾程車先。

2.       毀絲滅跡

衫衫褲褲丟晒佢,刪除電話所有紀錄,加密重要資料。

3.       捐錢
捐錢畀烈士打官司,香港社運介係需要成立抗爭基金,提供律師費同安家費。

4.       強身健體
做多啲運動,養兵千日,用在一時。

光復行動注意事項(唔睇唔好出嚟行)前言︰  小弟係一五年光復元朗入面被拉嘅一個。下面講嘅嘢,係結合自己同被捕者經歷嘅小小總結。旺角一役之後,每個出黎嘅人,就算係路經都好,都有可能被捕,希望大家認識下被捕嘅流程同權利。  任何示威已經被…

Seediq 賽德克发布于 2016年2月11日